70 : إيه ده ؟ .... إيه الكلام المكتوب علي السور ده ؟ رد تي : ده مكتوب كذا مرة علي الناحية دى من السور ... هاجيب اللاب توب علشان هايبقي صغير أوى ع الموبايل . ذهب تي لاحضار اللاب توب وعاد في أقل من دقيقتين . وبعد أن فتح اللاب توب قال : هاثبت الصورة وأعمل زووم وبدأ يقرأ بصعوبة :" يقول الكاتب الإنجليزي جورج برنارد شو : إن رجلا مثل محمد صلي الله عليه وسلم يستطيع أن يحل مشاكل العالم وهو يحتسي فنجانا من القهوة " قالت أمي : إيه ده .... مين اللي كتب الكلام ده ؟ قالت مريم : برنارد شو ايرلندى .... مش إنجليزي قالت ماما : صحيح ... لكن في كل الأحوال لازم نمسح الكلام ده . رد تي وقال : ليه ياناناه .... ده كلام كويس . رددت أنا وقلت : الكلام عن الإسلام لابد أن يكون معتمدا من جهة علمية اسلامية .... مش يتكتب علي الحيطان ..... ندهت إمي علي دادة مسعده ... ثم قالت : جورج برنارد شو كاتب مسرحي عظيم .... وكان موقفه من الإسلام .... موقف طيب .... ولكن الرسول صلي الله عليه وسلم .... عين أعيان الخلق كلهم .... لم يبعث ليحل مشاكل العالم وهو بيشرب القهوة ....لإن دي مهمة إدارية ووقتيه .... الرسول بعث برسالة سماوية ... لإسعاد البشرية في الدنيا .... في كل العصور ..... وفي الآخرة . وجاءت داده مسعدة وقالت لها أمي : كلمي زكريا وخليه يغطي الكتابة اللي علي السور البحري من بره بالبويه : حاضر وزكريا هو الذي يتولي جميع الإصلاحات في البيت بنفسه أوبالإستعانة بآخرين وانصرفت داده مسعده نظرت أنا إلي تي ووجهت له الكلام ... وإن كنت في حقيقة الأمر أوجهه إلي مريم : احنا المدح اللي بنعتز بيه هو لما ربنا سبحانة وتعالي قال عن الرسول صلي الله عليه وسلم في القرآن الكريم " وإنك لعلي خلق عظيم " و هنا قال تى : آه ... طبعا ... سيدنا محمد هو مؤسس الإسلام . قالت أمى بهدوء وان إنقلبت سحنتها تماما : جبت الكلام ده منين يا عز الدين . قال تى : من القاموس الإنجلش إنجلش ياناناه . ماما بهدوء : يابنى الإسلام رسالة سماوية من ربنا سبحانه وتعالى ، والرسالة دى وصلتنا عن طريق سيدنا محمد صلى الله عليه وسلم وختمت أمى كلامها بقوله تعالى : وَأَرْسَلْنَاكَ لِلنَّاسِ رَسُولًا ۚ وَكَفَىٰ بِاللَّهِ شَهِيدًا ونظرت أنا إلى وجه مريم ولم ألحظ أى ضيق أو أى تعبير عدائي .... وأسترحت لذلك وسمعنا آذان المغرب .... كان المؤذن هو الشيخ حسن ... ابن الشيخ مؤنس رحمه الله الذي كان يحفظنا القرآن ونحن أطفال .
الاثنين، 11 نوفمبر 2013
70
الاشتراك في:
تعليقات الرسالة (Atom)
ليست هناك تعليقات:
إرسال تعليق