47
ضحكت أنا وقلت لها : لأ ... أنا ماقلتش كده خالص ... لكن ... إحنا مثلا قلنا لها إن إحنا رايحين علشان نعمل تجارب معملية ... وده مش حقيقي ... وغالبا الكلام ده مادخلش عليها ......
: مادخلش عليها ؟ و قالت لك تعالي في المعمل اللي في الفيللا ؟
: يجوز جدا ....يمكن تكون عايزه تشوفك .
: بس هي ماتعرفنيش .
: ماهي عشان كده عايزة تشوفك .
: آه .... قول كده بقي .... كويس إنك وضحت لي ... ولو إني مافهمتش حاجة ...
طبعا هي فاهمة ... ولكن تدعي إنها لاتفهم ... مريم ماكرة ..... وأنا أحب المرأة الماكرة ...... خصوصا أذا كانت من معدن طيب ...... معدنها طيب .... طيب ولكن تعلوه طبقة من الصدأ.....
وقلت لها : بس كويس انك فكرتيني .... طبعا قدامهم لازم تتصرفي كمسلمة ... ومسلمة ملتزمة ...
أومأت برأسها لأسفل مرتين .....موافقة .... لكن لم تنطق ..... وشعرت أنا بالغضب ....
وجاء مترو وعوض وكل منهما يحمل كوبا من الشاي في يده ...مترو أعطي كوبا لمريم ..... عوض أعطاني الكوب الآخر .
عادا ادراجهما إلي جوار الزير .
أثناء شرب الشاي ... إلتزمنا أنا ومريم الصمت .... بينما كان مترو وعوض يتسامران ...و أسمعهما بوضوح ... قال عوض : إحنا قربنا علي مولد الست جميانة يامترو ... إعمل حسابك علشان نروح بدري .
: أنا ماقدرش أتأخر ع الست جميانة
: ياراجل يابكاش ... إنت بتروح عشان تمون ... من عند الحاج طلعت البرعي .
: الحاج طلعت البرعي حبيبنا من غير حاجة
وطول عمره راجل شهم وكريم مع كل الناس .... من أول يوم عرفته فيه ... في السنة اللي خدمت فيها في بلقاس ......من خمسة وثلاثين سنة ...
: فعلا .... حبيبك من غير رز وسمنه وظفر واللذي منه ؟
: والله أبدا .... حبيبنا من غير حاجة .... ووقت مابحب أروح له بروح له ..... لكن انت عارف اني بحب اروح المولد ... عشان الست جميانه .
: ياسيدي .... أنا بس باتنأوز شوية .... ياراجل يامسخرة ....
: أنا مش مسخرة .... إنت اللي قفل ....
ليست هناك تعليقات:
إرسال تعليق