49
وقال عوض لمترو : هانروح المولد بدري بقي يامترو .. ها ؟
: إنشاء الله
: إنشاء الله
وصلنا السيارة .... وفتح مترو الشنطة الخلفية وأخرج منها العلبة وأعطاها لعوض ... وطلبت منه مريم أن يناولها أحد العلبتين ومدت يدها بها لعوض الذي رفض بشده حتي أخذت أنا العلبة وأعطيها له عنوة .... فتههلل وجه و قبلني و قال لي أنه هايبعت زيارة فلاحي مع عوض .
شكرته وقلت له : الله يخليك ... إحنا فلاحين برضة ورايحين البلد ... خلي الزيارة مني لمترو .
: هو بيعتق ... ده منشار .
رد مترو : آه ... ما إنت فنجري أوى .... ومضيع فلوسك علي صحابك.
ضحكنا جميعا ... وركبنا السيارة .... مترو ...و مريم وأنا ... بينما عوض يودعنا بسلامات كثيرة .... كعادة أهل الريف الطيبيبن .
مترو أدار المحرك ...... وهو يقول كالمعتاد : توكلنا علي الله
وبدأت السيارة تتحرك ....
قلت أنا : ياعم فرج .... لما تعوز حاجة إبقي عدي ... خدها من عندنا ... من العزبة ....
: ههههه .... الله يكرمك ياباشا ....ده عوض بيتحايل علي عشان أخد .... ولا سيادتك فاكر عوض غلبان ولا إيه ؟
: لأ مش قصدي ..... بس يعني ....
: عوض ياباشا ....ربنا يزيده .... يحتكم علي عشر فدادين ...
: ربنا يزيد ويبارك ....
ورن جرس موبايل مترو و أخرجه من الجاكت الجلد ....
ورد هو : أيوة .... إهلا يا ام ريمون ..... ياستي علي إيه .... ده ريمون إبني .... ألف مبروك .....إنشا الله أول ناس هاتروح المولد...هانكون إحنا ....
ثم ضحك ملء شدقية وقال : حاضر ..... هاجيب معايا عجمية ...... إنشا الله .... مع السلامة .... الف سلامة .
مريم : لكن قولي ياعم مترو
: أيوه ياست هانم
: معلهش أصلي عايشة بره .... هو انتوا بتاخدو معاكو كحك وإنتو رايحين الموالد هنا .
ياعيني علي الأسئلة الترفيهية .
رد مترو متعجبا : كحك ..... !!! فين
؟ لامؤاخذة مش واخد بالي ياست هانم
: أصلي سامعاك بتقول إنك هاتاخد معاك عجمية من اللي بتتحط في الكحك .
ضحك مترو وتهلل وجهه ..... وظهرت علامات التعجب هذه المرة علي وجه مريم العاجي ....
: لامؤاخذه ياهانم ... عجمية دي تبقي مراتي ... وأنا سميتها كده عشان قصيرة وملظلظة .... زي الكوارع العجمية .
ضحكنا جميعا رغم إن كلمة ملظلظة لم تعجبني ... خصوصا في وجود مريم
وأستطرد هو : دي أصغر مني بكتير .... وبتقولي ياعم فرج ... أم ريمون تحبها قوي
قالت مريم : ربنا يخليها لك.
قلت أنا مداعبا : مين ؟ إم ريمون !
ضحكنا جميعا
ليست هناك تعليقات:
إرسال تعليق