: طبعا ... وعشان كده .. كنت باكتب في العيادة وعمري ما اخدت الكشكول البيت .
: يعني هو فتش العيادة ؟
: اه ... انا من الاول .. زي ماقلت لك ماكنتش بحبه ... وكنت باطلب الطلاق من حين لاخر .. لكن في السنة الاخيرة ... كنت باطلب باصرار .. لاني كنت قرفت منه ع الاخر .. ومن علاقاته .. . وفساده .... وقبل ما يطلقني فتش العيادة ضمن اجراءاته الاحترازية .. او ربما كان عايز يمسك علي اي حاجة .
: طيب ما كان ممكن ياخد الكشكول وخلاص ...
: ياخد الكشكول ... اه .. وهو عمل كده فعلا .. وخلاص .. لا .... منذر مش بتاع وخلاص ... منذر كان داىما يقول ... ان رجل المخابرات لايجب ابدا ان يترك خلفه اي اثر او دليل ... اوشهود احياء .... انت عارف .... في كل مرة سافر فيها خارج ايران .... كان بيغير شكله ... وعنده باسبورات كتير ... باسماء مختلفه .
: ياسلام !
: مش ممكن حد يحصل علي اي معلومات عنه ... تصدق .. انه اي مرة خرجنا فيها ...
اتغدينا فيه بره مثلا ... حتي لو في بيت حد من معارفنا ... كان بيستعمل كريم يخفي بصماته حتي لايحصل عليها حد .
وهنا فكرت انا في شئ اخر : وهو انتوا ماجبتوش اولاد .
: لا ... الحقيقة منذر كان متجوز قبل كده وعنده ابن يعيش مع طليقته .
: اه.. طليقته عايشة اهيهه ..
: طليقته دي كانت بنت عمه .. وماكملتش تعليمها .. ومعاها بوليصة تامين
: ايه ؟
: ايوه .. انها بتربي له ابنه .
واستطردت : لكن انا كنت حريصة اني ما احملش منه ... ومرة حملت وسقطت نفسي قبل بطني ماتكبر ويعرف .. وهو كمان ماكنش مهتم .. ربما لانه مكتفي بابنه ... اللي بيشوفه بالعافية ... وانا بالنسبة له كنت ست حلوة ونسب يشرف ويضمن له مزيد من النفوذ .
: يبقي هايعمل حساب للنفوذ ده .
: فعلا هو عامل حساب للنفوذ ده ... وعشان كده عمره ما هايحاول يقتلني في ايران ..
: طيب وانتوا اتطلقتوا من سنة ونص ... صح ؟
: صح
: طيب ...يعني لو كان في منك خوف ... كنتي سربتي اي معلومات عنه ... لرؤساؤه مثلا !
: صح ... بس هو اولا .. مش بيستنا حد يضايقه .. وثانيا هو مابيهموش رؤساؤه ...
: ازاى مايهموش ؟
: ولايهمه رؤساؤه ... ولايهمه السياسيين اللي في البلد .... . لان الفساد هو منظومة متكامله ... الجميع اسوا من الجميع .. وفي هذا الجو ... يعتبر الفساد شهادة ضمان لاستمرار المسؤول في منصبة ... انت سمعت عن نظرية الفساد المستمر ؟
: لا.
: اكيد ماسمعتش عنها طبعا ... لان الفيلسوف اللي كتبها هو منذر نفسه ... بيقول لك ياسيدي
ان الفساد المستمر هو عبارة عن معادلات متشابكة ... معقده ... لكنها موزونة كده . ... فهمت ؟
: تقريبا .
: يعني منذر مثلا بيقدم خدمات لا تقدر بثمن ... خصوصا انه علي استعداد لتقديم جميع انواع الخدمات القذرة......
: وبكده يضرب عصفورين بحجر .
: برافو عليك . .. يعني بيحصل علي منافع او يحملهم جمايل ....
: وفي نفس الوقت يبقي عرف اسرارهم وبيمسك عليهم حاجات .
: هههههه ... انت كنت معانا ولا ايه ...
: دي حاجة بديهية.
ليست هناك تعليقات:
إرسال تعليق