178
خرجنا من معرض السيارات ومريم وسعيد وسيد يباركون لى على السيارة الجديدة ... وقالت مريم : والموديل كمان إسمه حلو ... stella .... يعنى نجمة بالإيطالى .
قلت لها بصوت خافت : ماشاء الله .. قاموس فى كل اللغات .
ضحكت مريم وبدت السعادة ذات الطابع الهيستيرى على وجهها .
بمجرد دخولنا السيارة أخرجت من المحفظة ورقتين فئة المائة جنيه وأعطيت واحدة لسيد والأخرى بالطبع لسعيد ... رفضا فى البداية ولكننى أصررت وقلت لهما : دى حلاوة العربية .
طبعا أمطرانى شكرا ودعاء و ختم الدعاء سيد بسطاوى : ربنا يملاهالك بركة إنت والهانم .
فظهر الإرتياح والطمأنينة على وجه مريم العاجى .
سألنى سيد : سيادتك على فين ياباشا ؟
قالت مريم مشيرة بأصبعها على نادى الأطباء على الشاطئ وقالت : مش ده نادى الأطباء .
قلت لها بالإنجليزية : آه .... لكن لو رحت هناك ممكن ألاقى حد أعرفه ...
قالت بالإنجليزية : و ايه المشكلة ؟
قلت : هايسألنى انتى مين وبنعمل ايه والحاجات دى .
ظهر الإمتعاض على وجهها وقالت : خلاص ... بلاش .
فقلت لنفسى : نروح نادى الأطباء ولوحد سألنى أقول له انها خطيبتى ... وكمان أهو أأمن من غيره ... لأن الدخول للأعضاء فقط .
فقلت بالإنجليزية : نادى الأطباء .
ثم تذكرت إننى أخاطب سيد ... فقلتها له باللغة العربية وتحركت السيارة .
بعد قليل كنت أنا ومريم نجلس على مائدة وسيد وسعيد على مائدة أخرى قريبة . وطلبنا أنا ومريم قهوة ... وطلبت لهما جاتوه مع المياه الغازية التى طلباها .
وبينما أنا أقوم بوضع الخط والميمورى فى الموبايل الجديد .
قالت مريم : هو إنت مرتبط ؟
ويعد هذا السؤال من أكثر الأسئلة التى سمعتها من النساء فى حياتى .
قلت لها : لأ.
قالت : يمكن مرتبط عاطفيا بحد .
: لأ .
: أمال خايف من الناس ليه كده ؟
ناولتها الموبايل وأنا أقول
: أبدا .... بس انتى عارفه ... بحس إن الناس مهتمة بيه زياده عن اللزوم .
يبدو إن الكلام لم يرح مريم لأنها إمسكت الموبايل الجديد و اتصلت : ألو أيوه ياشيرين ...أنا مريم.... مش عارفه صوتى ولا إيه ! أخبارك ايه ؟ .... لا دى النمرة الجديدة .... أه غيرت النمرة .... اجراءات أمنية ... وإزى شكرى ؟ ... ابقى سجلى النمرة دى بقى لنناه و أنا ها أتصل بيها لما ارجع الفندق انتى عارفه ناناه بتطول وعايزة أكون ممدده ههههه ... شكرا... مع السلامة .
ليست هناك تعليقات:
إرسال تعليق